Kung Sakaling Sa Iyo Pa Rin Ito

0

I.
Iniisip ko kung
Sana nandito ka pa.
Pitong taon, pito na pala
kung di ka naman nawala
Hahanapin pa kaya kita?
Akala ko natapos na
Akong maghanap ng ikaw,
ng saiyo
At oo, naghanap nga ako, ng katulad mo,
Ng bukod sa iyo.
At oo, bumabalik akong wala, laging wala
walang nahanap na ikaw – o siya, o ako.
Pitong taon ng dalawampu’t limang alaalang
dala-dala ko.

II.
Binibilang ko ang lahat ng mga iniwan mo sa akin:
1 berdeng journal na hindi ko sinulatan kailanman (2011)
2 t-shirt na ginawa ko nang basahan
(pero nasa akin pa rin)
3 librong hindi ko na alam kung nasaan (natapos ko kayang basahin ang mga ito?)

III.
Hindi ako tumigil
sa paghahanap sa iyo –
Sa paghahanap sa iyo, hindi ako tumigil…
Nakikitakita sa mga estudyante kong
lagi kong iniiwasang kausap.
Naririnig kita sa mga musikang
basta na lamang tumutugtog – sa fx, sa taxi, sa kung saan mang kainan, at oo – kahit at
lalo sa simbahan.
Naamoy kita sa aking alaala at panaginip.
Nalalasahan kita satuwing biglang umuulan, sa dalas ng mga gabing pinagkakaitan ng
tulog, sa siksikan sa pila tuwing naghahabol sa pagdating ng tren.
Nadarama kita sa mga karakter
na lagi kong pinanghihinayangan
sa iba’t ibang kuwento ng nababasa ko.
At oo, nanghihinayang pa rin ako.

IV.
Binibilang ko ang lahat ng mga naiwan ko sa iyo:


1 tshirt na paborito ko, naiwan ko ito sa dorm ninyo noong minsang nakitulog ako – para
sa project mo.

2 librong pinahiram ko lang sa iyo – Langaw sa Isang Basong Gatas ni Amado
Hernandez at Banana Heart Summer ni Merlinda Bobis – huwag mo nang isauli, bumili
na ulit ako ng mga ito.

3 pinakamahalaga sa buhay ko: isip, oras, at puso.
4 na mga salita: ikaw, ako – tayo, wala?

V.
May pakpak ang balita, may pakpak ang wika,
Naghahabulan ang labo-labong mga salita –
naririnig mo ba?

VI.
Hinihintay kita gaya ng matiyaga kong
pagpila sa MRT tuwing umaga, Lunes hanggang Biyernes.
Inaasahan ko ang pagdating mo, o ng bahagi mo
Sa pagparoo’t paritong mga bus
tuwing Sabado na may espesyal na lakad ako.
Hinihintay kitang muli sa notification sa message request,
O mula sa text o tawag ng unknown number,
sa bawat Linggong umay na umay na ako.
Hinahanap kita sa loob at labas ng alam kong totoo.

VII.
Sa ikapitong araw, tulad ng diyos
nang likhain niya
ang langit at lupa
at ang lahat ng naririto –
nagpapahinga rin
ang mga pusong naghahanap.

About the Contributor – Wilmor Pacay 3rd is a BSE Filipino graduate of Philippine Normal University Manila where he served as literary editor and editor-in-chief of Aklas Literary Folio and The Torch Publications Manila. He held a stint as magazine editor at Diwa Asia Publishing Group, Inc. and content editor for Quipper Philippines. Presently, he isteaching Filipino, Research, and Creative Writing at Treston International College where he heads the official publication.

Share.
.
Loading...

Please follow our commenting guidelines.

Comments are closed.